س 1 - اعمل إيه لو حد من الشرطة وقفنى فى الشارع وسألني فين بطاقتك ؟
ج - لازم تعرف هو مين الأول..
س 2- ازاى ؟
ج قوله : أنا تحت أمرك بس الأول ممكن اعرف مين سيادتك..؟
س3- معقول الضابط ولا الأمين او حتى المخبر هايطلع الكارنيه بتاعه .. اكيد هايشتمنى أو يضربنى ؟
ج- من حقك تعرف مين اللى بيسألك . مش جايز يكون نصاب او حرامى عايز يثبتك ويقلبك ؟ وأنت فاهم غلط لان الضابط لو حس انك واثق من نفسك وعارف حقوقك مش هايشتمك او يهينك او يضربك .. لكن هايعاملك كويس وبكل احترام ومطلعتش بطاقتك لاى حد الا اذا طلعلك الكارنيه واتاكدت انه ضابط او أمين او مندوب شرطة لان القانون ألزم الشرطة أنهم يعرفوا الناس بشخصيتهم ..
لكن البنى ادم لازم يفرق بين واحد واقف جنب القسم ولابس ميرى ومعاه بوكس شرطة وواحد واقف فى حتة مقطوعة وعامل كمين بعربية أجرة او ملاكى وشكله مش ولابد…
س4- ممكن يطلعلى اى حاجة ..هو أنا عارف كارنيه الشرطة شكله ايه ؟
ج- كارنيه الشرطة وش وظهر..
س 5- مين من الشرطة من حقه يطلب بطاقتى ؟
ج- ضابط أو أمين او مندوب شرطة حتى الغفير من حقهم يشوفوا بطاقتك علشان يتأكدوا من شخصيتك
والبنى ادم السليم مايخافش ولازم توريهاله لو حد منهم طلب يشوفها لان القانون أدى للشرطة الحق ده ..
س6- من حقهم يشوفو البطاقة فى اى وقت ولا فى مواعيد محددة للسؤال عن البطاقة؟ ولو كنت انثى يسالونى عن بطاقتى ؟؟
ج- من حق الشرطة تطلب بطاقتك وتسال عنها راجل كنت او انثى فى اى وقت بالليل والنهار علشان تتحقق من شخصيتك ..
س 7- وايه عقوبة اللى يتمسك فى الشارع من غير بطاقة؟
ج- يتعمل له مخالفة عدم حمل بطاقة غرامتها ماتقلش عن 100 جنيه ولا تزيد عن 200 جنيه لكن مايتحبسش..
س8- من حق الضابط لو مش معاى بطاقة انه يقبض عليا او يفتشنى او يحبسنى ؟
ج- مش من حقه .. لان عدم حمل البطاقة مجرد مخالفة عقوبتها الغرامة ومش من حقه لا القبض ولا التفتيش ولا الحبس…
س9- اللى مطلع بطاقة لكن ناسيها يتحبس ؟؟
ج- مفيش حبس فى عدم حمل البطاقة ..لانها مخالفة وعقوبتها الغرامة مش الحبس …ومفيش حبس فى المخالفات وحاول تتصل بحد من اهلك او من اصحابك يجيبولك البطاقة احسن من المخالفة …
س10- اعمل ايه لو حد من الشرطة بعد ما شاف البطاقة سحبها منى او خدها ومرجعهاش ليا تانى؟؟
ج- ممنوع اى حد يسحب بطاقتك او يحتفظ بيها معاه لانه لو عمل كده يبقى ارتكب جريمة فى حقك والقانون يعاقبه..
س11- ايه الاوراق اللى تثبت الشخصية ؟؟
بطاقة الرقم القومى او جواز السفر او رخصة القيادة وهى دى الحاجات الى طالعة من وزارة الداخلية..
س12- شهادة الميلاد تثبت الشخصية ؟؟
ج- رغم ان شهادة الميلاد طالعة من وزارة الداخلية لكنها ماعلهاش صورتك وماينفعش تثبت بيها شخصيتك…
س 13- هل عقد الزواج ال عليه صورتي يجوز أثبت به شخصيتي؟
ج - لأ ما يجوزش لأنه مش صادر من وزارة الداخلية.
س14-هل رخصة تسيير السيارة لو باسمي تثبت شخصيتي؟
ج - رخصة السيارة علشان العربية و ترخيصها بس، و ما فيش عليها صورتك و لا تثبت الشخصية.
س 15 -لو كنت طالب أو طالبة في الجامعة يجوز كارنيه الجامعة يثبت شخصيتي بدل البطاقة؟
ج - كارنيه الجامعة معمول لدخول الجامعة بس و مايحلش محل البطاقة.
س 16- إيه السن اللي تصدر فيه البطاقة؟
ج - البطاقة تصدر لكل مواطن مصري بلغ 16 سنة من مكتب السجل المدني الساكن تبعه و خلال فترة ستة أشهر من بلوغه 16 سنة6.
س 17- و إيه عقوبة من يبلغ 16 سنة و ما يطلعش بطاقة؟
ج - يعاقب بالحبس مدة لا تزيد عن 6 أشهر أو غرامة لا تقل عن 100 جنيه و لا تزيد على 500 جنيه7.
س 18- أعمل إيه لو ضاعت بطاقتي أو اتسرقت أو تلفت؟
ج - تستصدر بدل فاقد أو بدل تالف من السجل المدني ال أنت ساكن تبعه خلال 15 يوم من ضياعها أو تلفها و من الأحسن لو بطاقتك ضاعت أو اتسرقت تعمل محضر في القسم ال ضاعت في دائرته بطاقتك علشان تخلي مسؤوليتك، لكن ما يجوزش إن حد يكون معه بطاقتين أو يتعامل بهم في نفس الوقت
س19 - يحصل إيه لو لقيت بطاقتي القديمة و استعملتها بعدما طلعت بدل فاقد؟
اللي يستعمل بطاقتين في وقت واحد يعاقَب بالحبس مدة لا تزيد عن سنة أو بغرامة لا تقل عن 200 جنيه و لا تزيد عن 500 جنيه و لو كان سبب ضرر للغير باستعماله البطاقة القديمة يعاقَب بالحبس مدة لا تقل عن 6 أشهر و بغرامة لا تقل عن 500 جنيه و لا تزيد على 1000 جنيه9.
س 20- أعمل إيه لو حد لقي بطاقتي و استعملها؟
ج - كل من يستعمل بطاقة غيره يتحبس مدة لا تقل عن سنة و بغرامة لا تقل عن 500 جنيه و لا تزيد عن 1000 جنيه أو بواحدة من العقوبتين، و ال يعطي بطاقته لغيره يستعملها يتعاقب بنفس العقوبة10.
س 21- هل لازم تكون معي بطاقة لو عاوز أشتغل في أي وظيفة؟
ج - لازم تكون معك بطاقة و تكون سارية و صالحة لأن ماحدش هيشغلك من غير بطاقة لأن أي صاحب عمل يشغل عنده حد من غير بطاقة يتحبس مدة لا تزيد عن 3 أشهر أو بغرامة لا تقل عن 200 جنيه و لا تزيد عن 500 جنيه.
س22 -أعمل إيه لو مسافر و عاوز أنزل في فندق و ما فيش معي بطاقة؟
ج - ماحدش يقدر ينزلك في أي فندق لأن أي مدير فندق لو سكن عنده نزيل من غير بطاقة يتحبس مدة لا تقل عن 6 أشهر أو يدفع غرامة لا تقل عن 1000 جنيه و لا تزيد على 3000 جنيه .
س 23 - لو كنت مسافر أو عايش خارج مصر ممكن أستصدر بطاقة؟ و منين أستصدرها؟
ج - تقدر تستصدر بطاقة من القنصلية المصرية في البلد ال أنت ساكن فيها12.
هل البطاقة القديمة تنفع دلوقتي ام لا ..؟
البطاقة القديمة انتهى العمل بها و كل الناس لازم تكون معهم بطاقة الرقم القومي.
